Molti di voi diranno ma come non si è conclusa l’avventura in Arabia Saudita della band? E perché una nuova pagina del diario di bordo? Beh, è arrivata una particolarissima mail e non potevamo non pubblicarla 🙂 un grazie di cuore al nostro grande amico Poeta Pitagorico a Riyad ed alla sua mente geniale!

[Aggiornamento del 4 giugno 2013: le poesie aumentano!]

ARRIVEDERCI A RIAD

‘O deserto quant’è bello…
Cu ‘sti ppalme e ‘sti cammelle…
Dimme tu che tiene n’mente…
Ca ‘e deciso ‘e ce lassa’…
Siente, sie’ ‘sti beduine…
Ca te guardane ‘ncantate…
E te vonne ‘sta vicine…
Nun se vonne fa’ lassa’…
Ma tu dice “Io parte, addio”…
da ‘sti ddune te ne vaie…
A ‘sta terra, ammore mio…
Nun vulisse cchiu turna’…
Ma nun ce lassà
Nun darce ‘sta tristezza!
A tutte prezze,
Torna a Riad!
Guarda ‘o mare ca sta’ a Gedda…
Quant’è belle e quant’è caro…
Addo’ ll’acqua nun è fredda…
Te putisse arrecria’…
Lassa ‘a sta’ ‘sta Danimarca,
Là fa’ fridde, nun da’ retta,
nun t’aspetta a Sirenetta…
Nun t’abbraccia comm’a ccà….
Ma tu dice “Io parte, addio”…
da ‘sti ddune te ne vaie…
A ‘sta terra, ammore mio…
Nun vulisse cchiu turna’…
Ma nun ce lassà
Nun darce ‘sta tristezza!
A tutte prezze,
torna a Riad!

NAPOLI A RIAD

Nce steve ‘nu paese curiusiello,
addo’ abballavano ca spada ‘mmano,
alluccanno vicine a ‘nu cammello,
scutuliannose accuosto chianu chiano…

Pe’ ggrazie ‘e ddie, venettene ‘e “Calimme”,
cu cchitarre, tammorre e tammurrelle,
ca cu ttalento, cu arte e cu cazzimme
nce cumbinaiene quatte tarantelle!!!

‘Ntra canzuncelle doce e appassiunate,
ca overo p’e senti nun ce sta prezzo,
“‘O sole mio”, “Uocchie c’arraggiunate”,
facettene senti pure “Munnezza”…

‘Na cosa sulamente nce mancaie,
v’o ddiche murmurianne ‘sti pparole…
vuie nun veristeve? Io me n’addunaie:
nun se purtaiene manco ddoie figliole!!!

Colpa lloro nun fuie… tenite mente:
fuiene ‘sti sceicche cacambrello!!!
Ma nun fa niente, ca sicuramente
‘o fatto ‘o stesso fuie sfizziuse e bello!!!

RAPPORTO DEL COMMISSARIATO DI VILLARICCA ALLA QUESTURA DI NAPOLI SUI FATTI ACCADUTI IN RIAD FRA L’8 E IL 10 MAGGIO 2013

Se so’ ‘mbarcate ‘ncoppe a n’aeroplano,
cu nacchere, tammorre e ballarine,
cu ttammurrelle e ‘na chitarra ‘mmano,
cu mmusica, e spartite malandrine.

“Aro’ iate ienne!!!” dice ‘a coppa ‘a mano
‘na figliulella avascio all’aeroporto,
“’stu fattarielle a mme me pare strano:
ma ‘sta ggente, ‘e strumente addo’ s’e pporta?”

“Nun darle aurienza”, dice ‘o capogruppo,
“Iamme, c’amma parti’, ia’, iamme belle,
cuonce cu chistu basso, ca te ‘ntuppe,
se po ssape’ che so’ ‘sti guarattelle?!?!”

‘Nzomma, saglie e s’assette ‘int’e ppultrone
‘sta cunfraternita c’a capa fresca…
Manco Pulecenella ‘n’cuppulone
avesse fatto ‘sta mmesca francesca!!!

S’aiza ll’aeroplano, embe’ e che fanno?!?!
quase stessero ‘nterra Margellina,
piglia, e a canta’ se metteno, vulanno,
tammurriatelle e canzuncelle fine…
Oine’ fusseve asciute pazze overo,
mettenneve a suna’ co’ manduline
mmieze a ‘stu bellu cielo ‘e primmavera,
comme a dduie prufessure ‘e cuncertino?!?!

Venimmencenne, ca pe lu rummore
ca faceve ‘sta ggente scunsacrata,
d’a cabina ‘o pilota ascette fora…
…mettennese a balla’ cu la brigata!

E comme pure ‘o riesto ‘e ll’equipaggio
participava a chesta Piererotta…
che v’aggia di’… io mo’ che sacciarraggio…
l’aeroplano perdette ‘a guida e ‘a rotta…

E ttale e quale a palummella ‘e notte
accummenciaie a vula’ senza custrutto,
a destra, e po’ a sinistra, e ‘ncoppe, e sotto,
fernenne dritte a ‘nu deserto asciutto!!!

Che se firaie ‘e fa’, appena atterrata,
chesta cumbriccula sciaguratella!!!
canzone scustumate, tammurriate,
riturnelle sfruntate, tarantelle…

Purtaiene ‘a femmena n’televisione,
facennala canta’ cu cocche mmossa….
Arrevutaine a tutta ll’audizione,
e ‘a ggiurnalista se facette rossa!!!
Nun cuntente, ca nun bastaie ‘o burdello,
pure facettene ‘sta sceneggiata:
senza manco avvisa’, ‘ncoppe ‘o cchiu bello,
cantaine pure dinte all’Ambasciata!!!

Pe ccheste oscenità senza perdono
– c’a Maronna ce scampe, arassusia!!! –
pe cchesti male azione, st’abbandono,
sti nnefandezze, chesti ppurcarie,

pe tutte ‘sti misfatte scellerate,
pe cchesti ‘nfamità, chesti scuncezze,
‘sti ccose malamente, ‘sti peccate,
chisti male servizie, ‘sti schifezze…

…nce sta ‘nu responsabile, anzi dduie…
so’ ricercate co’ nomme ‘e “Marenia”.
Nuie ggià ‘e ssapimmo, ‘o ddico pure a vvuie:
sonco ‘nu certo Lello e Maria Ylenia…

Con grande amicizia per tutti voi!!!